శ్రీ కార్తికేయ పంచకం
॥ ఓం శ్రీ శరవణభవాయ నమః ॥
శ్లోకం 1
విమలనిజపదాబ్జం వేదవేదాంతవేద్యం
మమ కులగురునాథం వాద్యగానప్రమోదమ్ ।
రమణసుగుణజాలం రంగరాడ్భాగినేయం
కమలజనుతపాదం కార్తికేయం నమామి ॥ ౧ ॥
శ్లోకం 2
శివశరవణజాతం శైవయోగప్రభావం
భవహితగురునాథం భక్తబృందప్రమోదమ్ ।
నవరసమృదుపాదం నాథ హ్రీంకారరూపం
కవనమధురసారం కార్తికేయం భజామి ॥ ౨ ॥
శ్లోకం 3
పాకారాతిసుతాముఖాబ్జమధుపం బాలేందుమౌళీశ్వరం
లోకానుగ్రహకారణం శివసుతం లోకేశతత్త్వప్రదమ్ ।
రాకాచంద్రసమానచారువదనం రంభోరువల్లీశ్వరం
హ్రీంకారప్రణవస్వరూపలహరీం శ్రీకార్తికేయం భజే ॥ ౩ ॥
శ్లోకం 4
మహాదేవాజ్జాతం శరవణభవం మంత్రశరభం
మహత్తత్త్వానందం పరమలహరీ మంత్రమధురమ్ ।
మహాదేవాతీతం సురగణయుతం మంత్రవరదం
గుహం వల్లీనాథం మమ హృది భజే గృధ్రగిరిశమ్ ॥ ౪ ॥
శ్లోకం 5
నిత్యాకారం నిఖిలవరదం నిర్మలం బ్రహ్మతత్త్వం
నిత్యం దేవైర్వినుతచరణం నిర్వికల్పాదియోగమ్ ।
నిత్యానందం నిగమవిదితం నిర్గుణం దేవదేవం
నిత్యం వందే మమ గురువరం నిర్మమం కార్తికేయమ్ ॥ ౫ ॥
ఫలశృతి
పంచకం కార్తికేయస్య యః పఠేచ్ఛృణుయాదపి ।
కార్తికేయ ప్రసాదాత్స సర్వాభీష్టమవాప్నుయాత్ ॥ ౬ ॥