సుందర రూప సుబ్రహ్మణ్య
పరుగున రారా భక్తవరేణ్య
ఎగురలేదా నెమలివాహనం
అందలేదా నా ఆహ్వానం
lసుందరl
ఆరు ముఖములతో అభయమూర్తివై
ఎదలో నిలువగ రమ్మని పిలువగ
ఆరు ముఖములతో అరిషడ్వర్గము
వచ్చి స్థిరపడినది నా హృదయమున
అజ్ఞానములో మునుగుక మునుపే
ఆదుకోరా అనుపమ ధీరా
lసుందరl
మాయాతీత మహిమోపేత
ఆవహించని కోరగ నిన్ను
మాయా భూతము ఆవహించినది
వీడని రీతిగ స్వామీ నన్ను
చంచలమతినై చెడిపోక మునుపే
చేయూతనీర చేరుకోర
lసుందరl
*ఓం కార్తికేయ నమః*