🕉️ శ్రీ అయ్యప్ప స్వామి దివ్య చరిత్ర 🕉️
🌺 ✨ 🌺 ✨ 🌺
గురుదక్షిణ
భక్తిప్రపత్తులతో గురువుగారికి పాదాభివందనం చేశాడు మణికంఠుడు. వినయం ఉట్టిపడుతోంది.
"గురుదేవా! విద్య నేర్పిన గురువుకు గురుదక్షిణ సమర్పించుకోకపోతే ఆ శిష్యుని జీవితం నిరర్థకమవుతుంది. మీరు చెప్పినదేదైనా సమర్పించి నన్ను ధన్యుడిని చేయండి."
ఆ మాటలు విన్న గురువు కొద్దిసేపు మౌనంగా ఆలోచించాడు. మణికంఠుడు సామాన్య బాలుడు కాదని, కారణ జన్ముడని తన అంతరాత్మ చెబుతోంది. తన సందేహాన్ని నివృత్తి చేసుకోవాలని ఆశ్రమంలో ఉన్న తన కుమారుడిని తీసుకొచ్చాడు.
గురుపుత్రునికి దివ్యానుగ్రహం
"మణికంఠా! నా కుమారుడు మూగ, చెవిటి, అంధుడిగా జన్మించాడు. అతడిని ఆరోగ్యవంతునిగా చేయగలవా?"
మణికంఠుడు చిరునవ్వుతో బాలుడి దగ్గరకు వెళ్లి కళ్లను, చెవులను, ముఖాన్ని తాకి...
"నీ పాపాలు ఈనాటితో పరిహారమయ్యాయి. గురుపుత్రా! ఇలా చూడు."
వెంటనే గురుపుత్రునికి మణికంఠుడు జ్యోతిర్మయ స్వరూపంగా దర్శనమిచ్చాడు. ఓంకార నాదం అతని చెవుల్లో ప్రవేశించింది. మాటలు స్వయంగా అతని నోటి నుండి వెలువడ్డాయి.
"జ్యోతి స్వరూపుడా! ఓంకార నాదాన్ని వినే భాగ్యాన్ని, మాట్లాడే శక్తిని ప్రసాదించిన నీకు నా కోటి కోటి ప్రణామాలు."
గురువు ఆనందం
గురువు ఆనందానికి అవధుల్లేవు. మణికంఠుడే పరమాత్మ అని గ్రహించి భక్తిపూర్వకంగా నమస్కరించాడు.
"మణికంఠా! నీవే పరమాత్మవు. వేదాలు, పురాణాలు, శాస్త్రాలన్నీ నీలోనే నిక్షిప్తమై ఉన్నాయి. మాకు బ్రహ్మజ్ఞానాన్ని అనుగ్రహించు."
మణికంఠుని ఉపదేశము
మణికంఠుడు గురువు, గురుపుత్రుల వైపు ప్రసన్నంగా చూసి బ్రహ్మజ్ఞానాన్ని ఉపదేశించడం ప్రారంభించాడు.
"గురువర్యా! ఈ సృష్టికి మూలమైన భగవంతుడు నిరాకారుడు. జ్ఞాననేత్రాలకు జ్యోతి రూపంలో దర్శనమిస్తాడు. సృష్టి కోసం బ్రహ్మరూపం, పోషణ కోసం విష్ణురూపం, లయ కోసం శివరూపం ధరించి జగత్తును నిర్వహిస్తాడు."
🙏 🌸 🙏 🌸 🙏
🌼 స్వామియే శరణం అయ్యప్ప 🌼